لو سمحت أشكر ربنا

لو سمحت أشكر ربنا
لما تكون ساكن فى بيت وغيرك مش لاقى مكان يبات فيه تبقى تشكر ربنا
لما تكون جعان وعندك أكل متوفر وغيرك ممكن يقعد يومين من غير ما ياكل تبقى تشكر ربنا
لما يكون عندك هدوم كتير ومحتار تلبس إيه ولا إيه وغيرك معندوش غير غيار واحد بس يغسله ويستنى لما ينشف عشان يلبسه تانى تبقى تشكر ربنا
لما يكون عندك شغل وغيرك مش لاقى شغل تبقى تشكر ربنا
لما يكون عندك عيلة أب وأم وأهل وغيرك عايش وحيد يتيم تبقى تشكر ربنا
لما تكون خلفتك كلها بنات ونفسك تجيب الواد وغيرك أديله سنين متجوز ومش عنده أى أطفال تبقى تشكر ربنا
وممكن تصوم فترة من الوقت
وبعد كده هيجى ميعاد تفطر فيه
ولكن
إيه رأيك أن فى ناس الصوم ده هو كل حياتهم
صايمين مش بأختيارهم ولكن دى حاجة مجبرين عليها
الواحد مننا لما عصافير بطنه تصوصو بيجرى يفتح التلاجة وياكل اللى نفسه فيه
ولكن
فى ناس حتى العصافير اللى فى بطنهم ماتت من الجوع
ياترى أحنا فين من الناس دى
لو سمحت أشكر ربنا على اللى عندك
فليست عطية بلا زيادة إلا التى بلا شكر
لوكاس فايز